Обединетата македонска дијаспора (ОМД) им се заблагодари на поранешниот потпретседател на САД, Jо Бајден и д-р Џил Бајден, што издадоа изјава денес на годишнината од Илинденското востание и го прославија успехот на македонско-американската заедница во Соединетите држави.
ОМД е невладина непартиска непрофитна добротворна организација. Како таква, ОМД не поддржува или се спротивставува на политичките партии или кандидати. ОМД ја информира јавноста за сите новости поврзани со македонско-американската заедница.
„Џил и јас испраќаме честитки до македонско-американската заедница, која што го празнува Илинден и антифашистичката декларација од 1944 година. Овие настани ја поставија основата за суверена, плуралистичка и мултиетничка република, која САД се горди да ја наречат пријател и сојузник, и која е длабоко почитувана членка на евроатлантската заедница“, се вели во изјавата на Бајден.
Тој рече дека Американците со македонско потекло, го зацврстиле и збогатиле американското општество.
„Како пријател на Американците со македонско потекло, го празнувам со вас успехот на македонско-американската заедница. Вие сте потсетник дека САД остануваат инспирација за надеж, слобода и можности“, рече Бајден, нагласувајќи дека како претседател би работел на постигнување помирна и попросперитетна евроатлантска иднина на целиот регион.
